هرتلات رمضانية

تحذير :

* إذا كنت بكامل قواك العقلية فلا تقرا هذا الموضوع

* وإذا كنت بنصف قواك العقلية فلا تقرأ ايضا هذا الموضوع

* أما إذا كنت بلا قوى عقلية ومقضيها بتنجان وملوخيه .. فمرحبا بك معنا في هرتلات

الله على زمان ورمضان زمان ..

كنا بنقف في البكونات نستنى مدفع الافطار وفي ايد كل واحد مننا كوباية ميه

ولما المدفع يضرب والمؤذن يقول الله اكبر .. ترد فينا الروح من جديد ..

ومع كل بوء ميه بنشربه الدم بيتنطط في عروقنا ..

افتكرت رمضان السنه دي ..أول يوم وتاني يوم من رمضان عدوا من غير ما أحس بالصوم

وأحس بيه دي يعني مفيش جوع ولا عطش

لذلك عزمت أمري وقررت اني احس بالصوم ..

ولان العبقرية مولوده معايا متعبتش كتير في التفكير

كانت الخطة مكونة من ثلاثة اهداف رئيسية وجاهزة للتنفيذ :

1- إني أجوع ..

ودي كان الحل أني خففت أكلتي على الفطار ونقنقت على السحور !!

2- إني أعطش ..

ودي برضه كان حلها اني اخلص مشاويري في عز الظهر .. وعشان يبقى زيادة الخير خيرين بقيت اقضي المشاوير مشي !!

3- إني استنى أذان المغرب بلهفة ..

وعشان ده يتحقق بقيت انام بعد العشا واصحى قبل الفجر ..

يعني نايم معظم وقت الفطار وصاحي طول وقت الصيام .تحقق الهدف المنشود وزيادة ..

وكانت النتيجة مذهله مش بس جوع وعطش ..

لاء دا زاد عليهم هبوط ودوخة وضربة شمس

وبدل ما استنى المغرب بلهفة كنت هموت العصر

طبعا حمدت ربنا ان اليوم التالت انتهى على خير .. وكل رمضان وانتم بخير ،،