يونيو ٠٣، ٢٠١٢

الحلم مش هيموت


متيأسيش يا بلد الحلم مش هيموت ..
مهما عِلِي الجلاد واستأسِد الهلفوت ..

ومتزعليش يا بلد ان كان شهيدك مات ..
ولا تلبسيش اسود ولا تسكبي الدمعات

ام الشهيد صابرة .. والصبر ماله حد
والظلم عبّى الجند وبقينا وقت الجد

لا طاطا وشفيقه هيلبسونا سواد
ولا يوم هيرجع فل يترأسك يا بلاد

لو كان شبابنا اتقتل يسترجل المولود
جيلنا يسلم جيل والجود من الموجود

ان كان معاهم فل ماسك فـ ايده سوط
فمعانا صوت الحق والرب فوق موجود ..

مايو ٢٨، ٢٠١٢

شفشقيات !!

شالوا مبارك جابوا شفيق ..
شعب اتعود عـ الخوازيق !!

يبقى مبارك كان غلبان
واحنا كـ شعب ملهوش امان !!

لما نهد الصنم الأكبر
علشان نعبد (ديك) اوثان !!

واما نكسّر قصر مبارك
علشان نبني قلعه وسور

يسكن فيها نسل مبارك
على انفاسنا سنين ودهور

ونقفل شارع تل أبيب
ونفتح جنبه ألف طريق !!

يبقى يا ريتنا ما قمنا بثورة
تدي الحكم لـ (حسني) جديد

ولا كان مات من شعبي الوف
علشان يحيا الباقي سعيد



رمز السلم ده (تِعبان)
مجرم فاسد فٍِل عنيد

شالوا جوز (سوزي) وجابو فريق
شعب اتعود عـ الخوازيق !!