][ وأخيرا .. ضحكت ][

البيت فاضي والجو من حواليا (هوس هوس)

ملل ومش جاي لي نوم

جبت ورقة وقلم عشان اكتب

معرفتش اجمع اي فكرة ولا اكتب أي حرف

قلت يا واد قوم اعمل لك كوباية شاي

لقيت ان مليش نفس للشاي

طب نسكافية

ولا حتى نسكافية

طب شغل التلفزيون واتفرج لو حتى على ملودي .. أهي تتحدى الملل

دقيقتين بالظبط وطفيته قبل ما يجيلي شلل

طب اتوضا وصليلك ركعتين يبخروا حالة الكآبة اللي عندك دي

شيطاني كان أقوى مني وفكرني إن المية قاطعة من الضهر

ولاني بقالي يومين عزابي باكل وارمي الصحون في الحوض من غير ما اغسلها

شكل حوض المطبخ بقى يسد النفس

بالتالي كنت بهرب من المنظر ده واركن الكوبايات والصحون ومعالق الشاي في حوض الحمام

وبقى شكله هوا كمان منيل بستين نيله

احساس مقرف انك تحس انك مش حاسس بحاجة

بتستنشق فراغ

كل ذكرياتك اتمسحت وجميع فيوزك مفصولة

شغلت الكمبيوتر ودخلت على النت

مفيش جديد

وحتى الجديد هوا نفسه القديم بس بتصريف

افتكرت الماسنجر

بقالي زمان مدخلتوش ..

فتحت موقع الياهو وبدأت انزله

رن موبايلي وكانت الساعة تلاته وعشر دقايق صباحا

بالنسبة لغيري ممكن يكون ده وقت غريب لمكالمة

بس بالنسبة ليا ده عادي

لان كتير عارفين اني بسهر

مين ياترى اللي بيتصل

فضلت باصص للرقم وانا بحاول افتكر شوفت الرقم ده قبل كده ولا لاء

الموبايل بطل رن قبل ما اتخذ قرار الرد من عدمه

قلت بركة يا جامع .. أنا أصلا مش برد على الارقام الغريبة

سبت الموبايل من ايدي ورجعت تاني اتابع الياهو .. وتحميل الماسنجر

مفيش دقيقتين ورن موبايلي تاني

نفس الرقم ..

مسكت الموبايل نفس المسكة

وبصيت لشاشته نفس البصة

وفضل يرن برضه لحد ما فصل

وقبل ما اسيبه من ايدي رنت نغمة الرسايل

فتحت الرسالة بفضول .. لقيتها كالتالي :

(تصدق عاد صدا مالها داعي

وآسفين ع الاتصال)

قلت في بالي : يلهوي ، مين اللي كان قاتله العشم ده وزعل اني صديته وما رديت عليه ؟؟

وعشان اريح ضمير سيمو اتصلت بيه

وفعلا فتح الخط وفضلت انا ساكت عشان اسمع الصوت واعرف مين المقموص ده

قال بحنية : ألوو

من حنية صوته مقدرتش أميز هوا مين .. بالتالي فضلت ساكت

فضل يقول الو .. وينفخ في السماعة وأنا ساكت ومركز في صوته عايز اعرف هوا مين

والاخر لقيته قفل !!

رغم ان أنا اللي متصل أما عبيط

ولان قلبي دليلي فضلت باصص لشاشة لموبايل مستني اتصاله

وفعلا اتصل

وفتحت خط وفضلت ساكت

وهوا يقول .. الوو .. هوووف هوووف

آآآآلووو .. يا ناس يا هوووو

وأنا برضه مركز قوي في صوته عايز اعرف هوا مين

والآخر لقيته بيقول : طيب ردي عليا .. كحي ، اضحكي .. قولي أي شي

( كحي .. قولي) ؟؟ يا ابن الايه .. انت فاكرني واحده وبتعاكسها ؟؟

طب والله لاوريك

وطبعا لقيت حاجة اتسلى بيها

قمت بسرعه لاغي تحميل الياهو عشان اسرع التصفح

وفاتح موقع .... وشغلت له اغنية .... وحطيت الاسبيكر

وفضلت الاغنية شغاله واخينا عمال يمدح في زوقي واختياري

وينقي من الاغنية كلمات ويهديهالي

كل ده وأنا بفكر .. يا ترى ضرب رقمي صدفة .. ولا حد من المقاطيع بتوعنا حب يعمل فيه مقلب اداهوله ؟ :D

قطع تفكيري صوت أذان الفجر

طفيت الاغنية وقربت المايك من بؤي

ورزعته أحلى بوسة .. امووووواه

وقلت له بصوت أجش : تصبح على خير يا حلو :D

قليل الزوق قفل الخط طبعا من غير ما يقول لي وانت من أهل الخير :(

ولان دي كانت عِشرة ربع سَاعة مهانش عليا انه يبات زعلان

بعت له رسالة كان محتواها الآتي :

(فرصة سعيدة و تعيش وتاكل غيرها)

رد عليا برسالة كان فيها الآتي :

( .........)

أما شخص مش متربي صحيح

بس كتر خيره .. أهو سلاني شوية :D

لقيت عندي احساس اني عايز اضحك

وأخيرا .. ضحكت